सेलू शहरातील वडगाव रोड परिसरात जुवाडी येथील जीनिंगमधून सुरू असलेल्या ओव्हरलोड ट्रॅक वाहतुकीमुळे नागरिकांचे जगणे अक्षरशः असह्य झाले आहे. दररोज मोठ्या प्रमाणात भरलेल्या ट्रॅकच्या वाहतुकीमुळे रोडवरील इलेक्ट्रिक तारा तुटण्याच्या घटना सातत्याने घडत असून रात्री दोन-दोन तास वीजपुरवठा खंडित केला जात आहे.
सध्या उन्हाळ्याची तीव्रता प्रचंड वाढलेली असताना नागरिकांना असह्य उकाड्याचा सामना करावा लागत आहे. लहान मुले, वृद्ध नागरिक आणि आजारी रुग्ण यांचे या उष्णतेमुळे मोठे हाल होत आहेत. त्यातच वारंवार होणाऱ्या वीज खंडितीमुळे नागरिकांमध्ये संतापाची भावना निर्माण झाली आहे.
स्थानिक नागरिकांनी अनेक वेळा संबंधित ट्रॅक चालक व जीनिंग व्यवस्थापनाला ट्रॅकमध्ये कमी लोड भरण्याची विनंती केली होती. मात्र प्रशासनाच्या दुर्लक्षामुळे ही ओव्हरलोड वाहतूक अजूनही सुरूच असल्याचा आरोप होत आहे.
या मार्गावर मोठ्या प्रमाणात केळी पिकविणारा व्यवसाय असून ओव्हरलोड ट्रॅकच्या वाहतुकीमुळे व्यापाऱ्यांचे देखील मोठे नुकसान होत आहे. रस्त्यावर सतत वाहतूक कोंडी, तारांचा धोका आणि वीजपुरवठा खंडित होण्यामुळे व्यापारी वर्गही संतप्त झाला आहे.
दरम्यान, काल रात्री पुन्हा एका ओव्हरलोड ट्रॅकमुळे इलेक्ट्रिक तार तुटल्याची घटना घडली. संतप्त नागरिकांनी संबंधित ट्रॅक रोखून धरत जोरदार निषेध व्यक्त केला. “यापुढे अशी ओव्हरलोड वाहतूक आढळल्यास तीव्र आंदोलन करण्यात येईल. याला संबंधित जीनिंग कंपनी आणि वीज वितरण विभाग जबाबदार राहील,” असा इशारा नागरिकांनी दिला.
रोजच्या या प्रकारामुळे नागरिक त्रस्त झाले असून पोलीस प्रशासन कारवाई का करत नाही? तसेच वारंवार लाईट बंद करण्यासाठी वीज वितरण विभाग कोणाच्या दबावाखाली मदत करत आहे का? असा सवाल आता परिसरातील नागरिक उपस्थित करत आहेत.
वडगाव रोडवरील खाली आलेल्या विद्युत तारांची उंची तात्काळ वाढवून ओव्हरलोड वाहतुकीवर कठोर कारवाई करावी, अन्यथा मोठा अपघात झाल्यास त्याची सर्वस्वी जबाबदारी प्रशासनावर राहील, अशी मागणी स्थानिक नागरिकांनी केली आहे.
