सेलू (प्रतिनिधी) – प्रभाग क्र. 12 मध्ये आज पहाटे मोठा अनर्थ टळला. गणेश पुंड यांच्या घरी लग्नाच्या तयारीदरम्यान सकाळी सुमारे 5 वाजण्याच्या सुमारास गॅस सिलेंडरला अचानक आग लागल्याची घटना घडली. घरात लगबग सुरू असताना ही घटना घडल्याने काही काळ भीतीचे वातावरण निर्माण झाले.
घटनेची माहिती मिळताच नगरपंचायत सेलूच्या अग्निशमन दलाने तात्काळ घटनास्थळी धाव घेतली. फायरमन हर्षल गोरखे यांनी प्रसंगावधान राखत तत्परतेने आग आटोक्यात आणली. त्यांच्या धाडसी आणि वेळीच केलेल्या कारवाईमुळे मोठा अनर्थ टळला.
या वेळी प्रतीक गुर्वे यांनीही मदतकार्यामध्ये सहभाग घेत सहकार्य केले. स्थानिक नागरिकांनी अग्निशमन दलाच्या कार्याचे कौतुक केले असून, त्यांच्या सतर्कतेमुळे संभाव्य जीवितहानी टळल्याचे सांगितले जात आहे.
या घटनेमुळे गॅस सिलेंडर वापरताना अधिक काळजी घेण्याचे आवाहन करण्यात येत आहे.
