‘गण गण गणात बोते’च्या जयघोषात आणि भक्तिमय वातावरणात हिंगणी येथील सुभेदार वाडी येथे श्री संत गजानन महाराज मंदिराची मुहूर्तमेढ रोवण्यात आली आहे. रविवार, दिनांक १२ एप्रिल २०२६ रोजी मंदिर उभारणीच्या पार्श्वभूमीवर जागेची ‘महाशांती पूजा’ हिंगणी ग्रामस्थांच्या उपस्थितीत अत्यंत उत्साहात पार पडली.
या सोहळ्यासाठी हिंगणी आणि परिसरातील भाविकांनी पहाटेपासूनच सुभेदार वाडी परिसरात गर्दी केली होती. मंदिरासाठी नियोजित असलेल्या जागेवर विधिवत महापूजा करण्यात आली. उपस्थित गुरुजींच्या मंत्रोच्चाराने आणि ‘गण गण गणात बोते’ या नामस्मरणाने संपूर्ण परिसर दुमदुमून निघाला होता. याप्रसंगी आयोजित करण्यात आलेला महायज्ञ हिंगणीकरांच्या साक्षीने पूर्ण झाला असून, लवकरच मंदिराच्या प्रत्यक्ष बांधकामाला सुरुवात होणार आहे.
ऐतिहासिक आणि आध्यात्मिक वारसा प्राप्त
हिंगणी नगरीला गजानन महाराजांच्या वास्तव्याचा ऐतिहासिक वारसा लाभलेला आहे. तर भाविकांनी दिलेल्या माहितीनुसार, गजानन महाराज हिंगणी येथील सुभेदार वाडीत वास्तव्यास होते. त्यांनी तत्कालीन सुभेदार गणेश यादव यांना आशीर्वाद दिला होता.
श्री गजानन विजय ग्रंथाच्या २० व्या अध्यायातील ७५ वी ओवी या घटनेची साक्ष देते.
महाराजांच्या पदस्पर्शाने पावन झालेल्या या भूमीत अनेक वर्षांच्या प्रतिक्षेनंतर भव्य मंदिर साकारले जात असल्याने भाविकांमध्ये आनंदाचे वातावरण आहे. सुभेदार वाडीतील हे प्रस्तावित मंदिर भक्ती आणि श्रद्धेचे मोठे केंद्र ठरेल, असा विश्वास ग्रामस्थांनी व्यक्त केला आहे.
