“सेलूत दारूमाफियांवर पोलिसांचा प्रहार ; बोर नदी परिसरात खळबळ”

दारू माफिया कुणाल पचारे फरार ; १.७९ लाखांचा मुद्देमाल उध्वस्त

सेलू प्रतिनिधी :
तालुक्यात अवैध दारू व्यवसायाने पुन्हा डोके वर काढले असून बोर नदी परिसरात सुरू असलेल्या मोहा दारूच्या भट्टीवर सेलू पोलिसांनी मंगळवार दि. 12 मे 2026 रोजी दुपारी 2 वाजताच्या सुमारास धडक कारवाई करत दारू माफियांचे धाबे दणाणून सोडले.

गुप्त माहितीच्या आधारे सेलू तालुक्यातील घोरड शिवारातील बोर नदीच्या काठावर, माधवराव झळके यांच्या शेतालगत झाडीपट्टीमध्ये सुरू असलेल्या अवैध मोहा दारू निर्मिती केंद्रावर पोलिसांनी अचानक छापा टाकला. यावेळी दारू माफिया कुणाल पचारे हा दारू भट्टीची तयारी करताना आढळून आला. मात्र पोलिसांची चाहूल लागताच त्याने जंगलाच्या दिशेने पळ काढत घटनास्थळावरून फरार होण्यात यश मिळवले.

या कारवाईदरम्यान पोलिसांनी तब्बल १६०० लिटर मोहा सडवा तसेच लोखंडी सहा ड्रम असा अंदाजे १ लाख ७९ हजार रुपयांचा मुद्देमाल पंचांसमक्ष नष्ट केला. या प्रकरणी महाराष्ट्र दारूबंदी कायद्यान्वये कलम ६५ (फ) अंतर्गत गुन्हा दाखल करण्यात आला आहे.

तालुक्यात अवैध दारूचा महापूर वाढत असताना पोलिसांनी केलेल्या या कारवाईमुळे अवैध धंदेवाल्यांमध्ये मोठी खळबळ उडाली आहे. ग्रामीण भागात खुलेआम सुरू असलेल्या दारू व्यवसायामुळे युवक व्यसनाधीन होत असल्याची संतप्त प्रतिक्रिया नागरिकांकडून व्यक्त होत आहे. त्यामुळे अशा कारवाया सातत्याने करण्याची मागणी नागरिकांनी केली आहे.

ही धडक कारवाई पोलीस अधीक्षक सौरभ कुमार अग्रवाल यांच्या मार्गदर्शनाखाली, ठाणेदार मनोज गबने यांच्या निर्देशानुसार सहाय्यक पोलिस उपनिरीक्षक निरंजन वर्भे, जमादार तुषार भुते व पोलिस कर्मचारी मंगेश राऊत यांनी केली. पुढील तपास सेलू पोलीस करीत आहेत.