हिंगणघाट येथे धर्मवीर छत्रपती संभाजी महाराज यांच्या अद्वितीय शौर्य, धर्मरक्षण आणि हिंदवी स्वराज्यासाठी दिलेल्या बलिदानाच्या स्मरणार्थ भव्य पूर्णाकृती पुतळा उभारण्याची जोरदार मागणी करण्यात आली आहे.
सकल हिंदू समाज, हिंगणघाट यांच्या वतीने महाराष्ट्र दिन निमित्त आमदार समीर कुणावार यांना निवेदन सादर करण्यात आले. या निवेदनात हिंगणघाट बस स्थानक परिसरात संभाजी महाराजांचा पुतळा उभारण्याची मागणी करण्यात आली आहे.
हिंगणघाट शहराच्या मध्यवर्ती ठिकाणी धर्मवीर संभाजी महाराजांचा पुतळा उभारणे हे केवळ एक स्मारक नसून हिंदू स्वाभिमान, अस्मिता आणि इतिहासाचा गौरव असल्याचे मत व्यक्त करण्यात आले. धर्मासाठी अमानुष छळ सहन करूनही हिंदुत्वाचा ध्वज झुकू न देणाऱ्या संभाजी महाराजांच्या स्मृतीला अभिवादन करण्याची ही योग्य वेळ असल्याचेही नमूद करण्यात आले.
सकल हिंदू समाजाने स्पष्ट इशारा दिला असून, पुतळा उभारणीसाठी आवश्यक निधी मंजूर करून तात्काळ कार्यवाही करावी, अन्यथा तीव्र लोकआंदोलन उभारण्यात येईल, असा इशाराही देण्यात आला. हजारो नागरिकांच्या उपस्थितीत हा आवाज बुलंद करण्याची तयारी दर्शविण्यात आली आहे.
दरम्यान, आमदार समीर कुणावार यांनी या मागणीला सकारात्मक प्रतिसाद देत योग्य ती कार्यवाही करण्याची ग्वाही दिली.
या उपक्रमाला राष्ट्रीय स्वयंसेवक संघ, विश्व हिंदू परिषद, शिवप्रतिष्ठान हिंदुस्थान, शिवसेना, मराठा सेवा संघ आणि बजरंग दल यांसह विविध हिंदुत्ववादी संघटनांचा पाठिंबा मिळाला आहे.
निवेदन देताना विविध संघटनांचे पदाधिकारी व कार्यकर्ते मोठ्या संख्येने उपस्थित होते. त्यामध्ये शरद कोणप्रतिवार, अमित गावंडे, रोशन नागमोते, श्याम इडपवार, अभय संचेती, ओमप्रकाश मस्कर, गजानन मसाये, अनुकूल कोचर, प्रशांत तिवारी, राम नक्के, सुरेंद्र आगरे, पंकज देशपांडे, देवा वाघमारे, प्रमोद टिपले, दीपक शर्मा, हर्षल लाखे, मनीष शेंडे, सुरेश बुराडकर, रवी नौकरकर, नरेंद्र गंधारे, संदीप नासरे, योगेश नासरे, धर्मा जोशी, राहुल फटिंग, शंकर गेडेकर, सूरज वरठी, राम खोकले, विक्की महाकाळकर, मुन्ना त्रिवेदी, श्रेयस वानोडे, आकाश छापेकर, सौरभ कावळे, रवी रोहनकर, मनीष तडस, अमित देवढे, सचिन उदासी, निशांत काकडे, सुरज कावळे, यश बोरुटकर, सचिन पाहाडे, दामोदर वानखेडे आदींचा समावेश होता.
