सेलू : शहरात पुन्हा एकदा चोरट्यांनी डोके वर काढले असून वारंवार घडणाऱ्या चोरीच्या घटनांमुळे नागरिकांमध्ये भीतीचे वातावरण निर्माण झाले आहे. वार्ड क्रमांक 5 परिसरात मध्यरात्री चोरट्यांनी धाडसी चोरी करत एका दुचाकीवर हात साफ केला.
मिळालेल्या माहितीनुसार, श्री. प्रमोद पानकावसे यांच्या घराच्या गेटचे कुलूप तोडून चोरट्यांनी CB Shine कंपनीची मोटरसायकल (क्रमांक MH32-AN1692) चोरून नेली. ही घटना मध्यरात्रीच्या सुमारास घडली असून चोरट्यांनी अत्यंत नियोजनपूर्वक ही चोरी केल्याचे दिसून येत आहे.
याच परिसरात श्री. प्रमोद पोहणे यांच्या घराचेही गेटचे कुलूप तोडण्यात आले. मात्र, त्यांची दुचाकी चोरी करण्यात चोरट्यांना यश आले नाही. त्यामुळे मोठा अनर्थ टळला असला तरी या प्रकारामुळे परिसरातील नागरिकांमध्ये दहशतीचे वातावरण आहे.
सतत वाढत असलेल्या चोरीच्या घटनांमुळे नागरिकांमध्ये असुरक्षिततेची भावना वाढत असून पोलिस प्रशासनाने तत्काळ लक्ष देऊन कडक कारवाई करावी, अशी मागणी नागरिकांकडून होत आहे. तसेच रात्री गस्त वाढवून चोरट्यांवर अंकुश ठेवण्याची गरज व्यक्त केली जात आहे.
