द्रौपदी मुर्मू यांच्या प्रमुख उपस्थितीत महात्मा गांधी आंतरराष्ट्रीय हिंदी विश्वविद्यालय, वर्धा येथे सहावा दीक्षांत समारंभ मोठ्या उत्साहात पार पडला. या वेळी महाराष्ट्राचे राज्यपाल जिष्णु देव वर्मा, मंत्री चंद्रशेखर बावनकुळे तसेच राज्यमंत्री पंकज भोयर यांची प्रमुख उपस्थिती होती.या समारंभात एम.ए. राज्यशास्त्र विषयात 8.22 सीजीपीए मिळवणाऱ्या सुचिता शोभा नारायण नागपुरे हिला विद्यापीठाच्या कुलगुरू डॉ. कुमुद शर्मा यांच्या हस्ते सुवर्णपदक प्रदान करण्यात आले. तिच्या या उल्लेखनीय यशाबद्दल उपस्थित मान्यवरांनी तिचे कौतुक केले.सुचिताने आतापर्यंत तीन वेळा यूजीसी नेट परीक्षा उत्तीर्ण केली असून, पहिल्याच प्रयत्नात महाराष्ट्र राज्य पात्रता (SET) परीक्षा देखील यशस्वीरीत्या पार केली आहे. आपल्या या यशाचे श्रेय ती आपल्या आईला तसेच शिक्षकांना देते.
दरम्यान, मान्यवरांच्या उपस्थितीत पार पडलेल्या या दीक्षांत समारंभामुळे विद्यार्थ्यांमध्ये उत्साहाचे वातावरण निर्माण झाले असून, यामुळे शैक्षणिक प्रगतीस नवी प्रेरणा मिळाल्याची भावना व्यक्त करण्यात आली.
