वर्धा जिल्ह्यातून एक अत्यंत धक्कादायक घटना समोर आली आहे. सेलू तालुक्यातील रिधोरा डॅम येथे एका 17 वर्षीय तरुणीने आत्महत्या केल्याची घटना उघडकीस आली आहे.
मिळालेल्या माहितीनुसार, वर्धा येथील रामनगर परिसरात राहणारी काजल गजानन रोकडे (वय 17 वर्ष) ही तरुणी काल सायंकाळी सुमारे 6 वाजल्यापासून घरातून बेपत्ता होती. बराच वेळ घरी न परतल्यामुळे तिच्या कुटुंबीयांनी परिसरात तिचा शोध सुरू केला, मात्र ती कुठेच आढळून आली नाही.
यानंतर कुटुंबीयांनी तिचे सोशल मीडिया अकाउंट तपासले असता, काजलने सायंकाळच्या सुमारास सेलू तालुक्यातील रिधोरा डॅम येथे काही फोटो काढून शेअर केलेले आढळून आले. ही माहिती मिळताच कुटुंबीयांनी तातडीने रिधोरा डॅम परिसरात जाऊन पाहणी केली.
तेथे पोहोचल्यावर डॅमजवळ काजलची ॲक्टिव्हा गाडी (क्रमांक MH 32 AB 3679) उभी असल्याचे दिसून आले. तसेच डॅमच्या काठावर तिची बॅग, चप्पल आणि मोबाईल फोन सुद्धा आढळून आला. त्यामुळे कुटुंबीयांनी तात्काळ पोलिसांना याची माहिती दिली.
घटनास्थळी सेलू पोलिस ठाण्याचे ठाणेदार व पोलीस पथक दाखल झाले आणि त्यांनी परिस्थितीची पाहणी केली. त्यानंतर स्थानिक मच्छीमारांच्या मदतीने डॅममध्ये शोधमोहीम सुरू करण्यात आली. काही वेळाच्या शोधानंतर पाण्यातून काजलचा मृतदेह बाहेर काढण्यात आला.
यानंतर पोलिसांनी पंचनामा करून मृतदेह शवविच्छेदनासाठी सेलू येथील ग्रामीण रुग्णालयात पाठवण्यात आला आहे.
दरम्यान, या आत्महत्येमागचे नेमके कारण अद्याप स्पष्ट झालेले नाही. या प्रकरणाचा पुढील तपास सेलू पोलिस स्टेशनकडून सुरू आहे.
या घटनेमुळे परिसरात हळहळ व्यक्त केली जात असून, कुटुंबीयांवर दु:खाचा डोंगर कोसळला आहे.
गणेश खोडके सह रोशन वांदिले स्क्रिप्ट सेलू
