महाराष्ट्रातील महा-ई सेवा केंद्र व आधार सेवा केंद्र चालकांच्या विविध प्रलंबित मागण्यांसाठी आज, ९ मार्च २०२६ रोजी मुंबईतील आझाद मैदान येथे भव्य धरणे आंदोलन आयोजित करण्यात आले आहे. अखिल स्तरीय महा-ई सेवा केंद्र व आधार सेवा केंद्र संघटनेच्या वतीने हे आंदोलन पुकारण्यात आले असून राज्यभरातील सर्व केंद्र चालकांना मोठ्या संख्येने उपस्थित राहण्याचे आवाहन करण्यात आले आहे.
राज्यातील महा-ई सेवा केंद्र चालक तसेच आधार सेवा केंद्र चालक अनेक वर्षांपासून विविध शासकीय सेवा नागरिकांपर्यंत पोहोचविण्याचे काम करत आहेत. मात्र, या सेवा देताना त्यांना अनेक प्रशासकीय अडचणी तसेच आर्थिक समस्यांना सामोरे जावे लागत असल्याचा आरोप संघटनेने केला आहे. या पार्श्वभूमीवर शासनाने केंद्र चालकांच्या प्रलंबित मागण्यांकडे लक्ष द्यावे, तसेच त्यावर तातडीने सकारात्मक निर्णय घ्यावा, या मागणीसाठी हे आंदोलन करण्यात येत आहे.
संघटनेच्या पदाधिकाऱ्यांनी दिलेल्या माहितीनुसार, महाराष्ट्रातील सर्व महा-ई सेवा केंद्र चालक, आधार सेवा केंद्र चालक तसेच VLE बांधवांनी मोठ्या संख्येने या आंदोलनात सहभागी होऊन आपल्या हक्कांसाठी आवाज बुलंद करावा, असे आवाहन करण्यात आले आहे.
हे आंदोलन केंद्र चालकांच्या हक्कांसाठी, त्यांच्या व्यवसायाच्या भविष्याकरिता तसेच शासनापर्यंत आपला आवाज पोहोचवण्यासाठी आयोजित करण्यात आले असल्याचे संघटनेने स्पष्ट केले आहे. राज्यभरातील अनेक जिल्ह्यांतून केंद्र चालक मुंबईकडे रवाना झाले असून आझाद मैदानावर मोठ्या संख्येने उपस्थिती राहण्याची शक्यता व्यक्त केली जात आहे.
दरम्यान, या आंदोलनामुळे शासनाचे लक्ष वेधले जाईल आणि केंद्र चालकांच्या मागण्यांवर लवकरात लवकर निर्णय होईल, अशी अपेक्षा आंदोलनकर्त्यांकडून व्यक्त करण्यात येत आहे.
